२०५२ फागुन १ गते नेपाली जनताले सदियौंदेखिको उत्पीडन र शोषकका विरुद्ध विद्रोह सुरु गरेको दिन , यस दिनलाई नेकपा माओवादी केन्द्रले विशेष दिनको रुपमा जनयुद्ध दिवसको रुपमा मनाउँदै आएको छ। यस वर्ष पनि माओवादी निकट पार्टी पंक्तिहरूले देश तथा विदेशमा विभिन्न कार्यक्रम गर्दै भव्य रुपमा मनाएका छन्।यस दिनको अवसरमा नेकपा माओवादी केन्द्रका अध्यक्ष कमरेड पुष्पकमल दाहाल प्रचण्डले शुभकामना दिनुभएको छ। यसको अंश विस्तृतमा तल राखिएको छ।

जनप्रगतिशील मञ्च अस्ट्रेलियाले पनि यस अवसरमा महान सहिदहरूको स्मृति गर्दै दीप प्रज्वलन तथा माल्यार्पण कार्यक्रम गरेको छ अस्ट्रेलियाका Sydney, Canberra, Melbourn, Brisbane लगायतका राज्य कमिटीले छुट्टाछुट्टै कार्यक्रम गरेका छन् कार्यक्रममा जनप्रगतिशील मञ्च अस्ट्रेलियाका पदाधिकारी तथा अन्य सामाजिक  ,व्यावसायिक व्यक्तित्वहरूले आफ्नो मन्तव्य राख्नुभएको छ ।

जनप्रगतिशील मञ्च अस्ट्रेलियाका केन्द्रीय अध्यक्ष दीपक पाण्डेज्यूले यस अवसरमा महान सहिदहरूको योगदान स्मृति गर्दै देश तथा विदेशमा रहनुहुने सम्पूर्ण नेपाली दाजुभाई तथा दिदीबहिनीहरुलाई शुभकामना व्यक्त गर्नुभएको छ। जनप्रगतिशील मञ्च अस्ट्रेलियाले सम्पूर्ण शहीदहरूको योगदानको स्मृति गर्दै शहीदहरूको योगदानप्रति कदर गर्दै बाँकी रहेका कामहरू पूरा गर्ने जिम्मेवारीलाई मध्यनजर गर्दै आगामी कार्य योजना तर्जुमा गर्ने बताउनुभएको छ । अहिले शान्तिपूर्ण मोर्चामा रूपान्तरण भएको र समाज रूपान्तरणमा बाँकी कार्यभार पुरा गर्ने जिम्मेवारी हामी सबैको माझमा भएको हुनाले इतिहासले सुम्पेको कार्यभार पुरा गर्न सुशासन र सामाजिक न्याय सहितको समृद्धिका लागि एकजुट हुन सम्पूर्ण जनसमुदायमा अपिल गर्नुभएको छ। 

फागुन, २०८१ पुष्पकमल दाहाल ‘प्रचण्ड’ (अध्यक्ष) नेकपा माओवादी केन्द्र, केन्द्रीय कार्यालय

३० औं जनयुद्ध दिवसको हार्दिक शुभकामना आदरणीय जनसमुदाय, २०५२ फागुन १ गते, नेपाली जनताले सदियौँदेखिको उत्पीडन र शोषणका विरुद्ध विद्रोह सुरु गरेको दिन । हाम्रा लागि यो दिन नेपाली जनताको ऐतिहासिक संघर्ष र शहीदहरूको बलिदानको सम्मान गर्दै आगामी यात्राका लागि सङ्कल्प गर्ने दिन हो । महान जनयुद्धको यस ऐतिहासिक दिनमा म देशभित्र र बाहिर रहनुभएका सम्पूर्ण नेपाली जनतामा हार्दिक शुभकामना व्यक्त गर्दछु । जनयुद्धका क्रममा आफ्नो अमूल्य जीवन बलिदान गर्ने महान शहीदहरूप्रति भावपूर्ण श्रद्धाञ्जली अर्पण गर्दछु । बेपत्ता योद्धाहरूप्रति उच्च सम्मान व्यक्त गर्दै, घाइते योद्धाहरूप्रति सम्मानसहित शीघ्र स्वास्थ्यलाभको कामना गर्दछु । अहिलेको पुस्तालाई जनयुद्ध किन आवश्यक थियो र यसले के उपलब्धि हासिल गर्यो भन्ने प्रश्न मनमा लाग्न सक्छ । यो प्रश्न गर्दा जनयुद्ध नभएको भए हामी कहाँ हुन्थ्यौं भन्ने कुरा बुझ्नु जरुरी हुन्छ । यो देशमा सामन्ती शोषण थियो । एउटा वंश र त्यसको वरिपरि घुम्ने सामन्तहरूले जनताको भाग्यको फैसला गर्ने गर्दथे । दलित, महिला, आदिवासी जनजाति, मधेशी, मुस्लिम, थारु लगायतका वर्ग र समुदायमाथि चरम विभेद र उत्पीडन थियो । त्यो स्थितिमा टालटुल र सुधार गरेर समाजको आमूल रूपान्तरण सम्भव थिएन । यसका विरुद्ध प्रतिरोधको अनिवार्यता नै जनयुद्धका रूपमा प्रकट भएको हो। इतिहासमै पहिलोपटक युगौँदेखि दबाइएका दलित, जनजाति, मधेसी, थारु, महिला, मुस्लिम, सुदूरपश्चिम र कर्णालीबासी लगायत उत्पीडित समुदाय र क्षेत्रसहित आम जनता आफ्ना अधिकारको रक्षाका लागि संघर्षमा होमिए । जनताले यो स्तरको प्रतिरोध नगरेको भए हामी अहिले पनि सामन्ती शोषणमै हुने थियौं । राजनीतिक अधिकारदेखि समाजमा यो स्तरको चेतनाको विकास हुने थिएन । त्यसैले जनयुद्ध आधुनिक नेपाली राजनीतिको एक महान् परिघटना थियो, हामी यसमा गर्व गर्छौं । आदरणीय जनसमुदाय, जनताको यही प्रतिरोधका कारण आज राजतन्त्रको अन्त्य भई संघीय लोकतान्त्रिक गणतन्त्रको स्थापना भएको छ । जनताले चुनेका प्रतिनिधिहरूबाट संविधान बनेको छ र शासनसत्तामा उत्पीडित समुदायको प्रतिनिधित्व सुनिश्चित हुने बाटो खुलेको छ । सिंहदरबारमा मुट्ठीभर उच्च सम्भ्रान्त वर्गका हातमा रहेको शक्ति गाउँघरमा पुगेको छ । देशमा तीन तहको सरकारको स्थापना भएको छ । राज्यसत्तामा समानुपातिक समावेशिता सुनिश्चित भएको छ । धर्मनिरपेक्षता कायम भएको छ । आज शासनका हरेक तहमा महिलाहरूको प्रतिनिधित्व अनिवार्य भएको छ । दलितहरूको उपस्थिति सम्भव भएको छ। जनयुद्ध नभएको भए यसखालको अधिकारप्रतिको जागरण, प्राप्ति र यसको अभ्यास संभव थिएन। हामी एउटा विशिष्ट परिस्थितिमा शान्ति सम्झौतामार्फत शान्ति प्रक्रियामा सहभागी भयौं । यो हामीले गरेको नयाँ प्रयोग हो । इतिहासमै पहिलोपटक नेपाली जनताका अधिकार संविधानमार्फत संस्थागत गर्न सफल भयौं । राज्यको पुनःसंरचना गरियो । समृद्धि, न्याय र समानताका लागि आधार तयार भयो। यो जनयुद्धकै कारण सम्भव भएको हो । यो प्रक्रियामा हामीबाट कतिपय कमीहरू पनि भए तर हाम्रो नियतमा कहिल्यै खोट थिएन । हामी यथास्थितिमा बस्न चाहेनौं । हामी नेपाली जनता र नेपाली समाजको अग्रगमनका पक्षमा निरन्तर लागिरह्यौं । त्यसैले, हामी खुला हृदयका साथ आफ्ना कमजोरीको पनि समीक्षा गर्दै अघि बढिरहेका छौं । आदरणीय जनसमुदाय, आजको दिन हामीले के हासिल गर्यौं र के गर्न बाँकी छ भन्ने समीक्षाको दिन पनि हो । हाम्रो संघर्षले व्यवस्था बदलियो तर जनताको अवस्था बदल्ने हाम्रो कार्यभार भने अझै पूरा भइसकेको छैन । दलितका अधिकारहरू संविधानतः सुनिश्चित भए पनि व्यवहारमा अझै विभेद र उत्पीडन कायमै छ । महिलाहरू अझै पनि पूर्ण रूपमा सुरक्षित र स्वतन्त्र हुन सकेका छैनन् । संघीयता अझै संस्थागत भइसकेको छैन। समावेशिता साँचो अर्थमा उपेक्षित र उत्पीडित वर्गलाई राज्यको मूलधारमा ल्याउने गरी पूर्ण रूपमा कार्यान्वयन हुन सकेको छैन । आज हामी क्रान्तिको शान्तिपूर्ण मोर्चामा छौं । हाम्रा सामु जनविश्वास र जनमतको सम्मानद्वारा समाज रूपान्तरणका बाँकी कार्यभार पूरा गर्ने जिम्मेवारी छ । जनताप्रति इमानदार हुँदै, संघर्षबाट प्राप्त उपलब्धिहरूलाई संस्थागत गरी समाजवादी क्रान्तिको तयारीमा लामबद्ध हुने ऐतिहासिक अभिभारा हाम्रो अगाडि छ । इतिहासले सुम्पेको यो कार्यभार पूरा गर्न सुशासन र सामाजिक न्यायसहितको समृद्धिका लागि एकजुट हुन म आम जनसमुदायमा हार्दिक अपिल गर्दछु । महान जनयुद्ध जिन्दावाद समाजवादी क्रान्ति जिन्दावाद १ फागुन, २०८१ पुष्पकमल दाहाल ‘प्रचण्ड’ (अध्यक्ष) नेकपा माओवादी केन्द्र, केन्द्रीय कार्यालय