काठमाडौं ।
संविधान दिवसको अवसरमा आयोजित कार्यक्रममा नेकपा एमाले अध्यक्ष तथा पूर्व प्रधानमन्त्री केपी शर्मा ओलीले जेनजी आन्दोलनसँग सम्बन्धित घटनाबारे स्पष्टिकरण दिएका छन्। ओलीले आन्दोलनका बेला प्रदर्शनकारीमाथि गोली चलाउन तत्कालीन सरकारले कुनै निर्देशन नदिएको बताए।

उनका अनुसार प्रहरीसँग नभएका स्वचालित हतियार प्रयोग भएकाले वास्तविकता उजागर गर्न निष्पक्ष छानबिन अपरिहार्य छ। ओलीले उक्त घटनामा ज्यान गुमाएका युवाप्रति श्रद्धाञ्जली अर्पण गर्दै घाइतेहरूको शीघ्र स्वास्थ्य लाभको कामना समेत गरे।

संविधानले नेपालको सार्वभौमसत्ता बलियो बनाएको दाबी गर्दै उनले मुलुकलाई नाकाबन्दीको जोखिमबाट जोगाउन उत्तर–दक्षिण यातायात संरचना विस्तारमा ध्यान दिएको स्मरण गराए। साथै उनले चीनसँग पारवहन सम्झौता, विकास संरचनाको जग बसाल्ने काम र अर्थतन्त्रलाई मजबुत बनाउन आफू नेतृत्वमा गरिएको पहललाई पुनः औंल्याए।