जुनकिरी साहित्य समाजले वार्षिकोत्सव कार्यक्रम भव्य र अर्थपूर्ण रूपमा सम्पन्न

अमेरिका २१। नारद आचार्य सुदामा।

जुनकिरी साहित्य समाजले आफ्नो स्थापना भएको एक वर्ष पूरा भएको अवसरमा विशेष वार्षिकोत्सव कार्यक्रम भव्य र अर्थपूर्ण रूपमा सम्पन्न गरेको छ । साहित्यिक चेतना, सिर्जनशील ऊर्जा र भावनात्मक सौन्दर्यको अनुपम सङ्गम बनेको उक्त समारोहले सहभागी स्रष्टा–सर्जकहरूलाई गहिरो अनुभूति दिलाएको थियो ।

भर्चुअल माध्यममार्फत भएकाे वार्षिकोत्सवमा संस्थाका अध्यक्ष राजेश भण्डारीको सभाध्यक्षतामा सम्पन्न कार्यक्रम राष्ट्रिय गानको धुनसँगै औपचारिक रूपमा प्रारम्भ भएको थियो । कार्यक्रमको सञ्चालन सलिन विष्टले साहित्यिक मर्यादा र सन्तुलित प्रस्तुतीकरणका साथ प्रभावकारी रूपमा गरेका थिए ।

समारोहमा संस्थाका उपाध्यक्ष नेहा कँडेल, कोषाध्यक्ष नबिन रोकाया लगायत कार्यसमितिका पदाधिकारीहरूको उल्लेखनीय उपस्थिति रहेको थियो । स्वागत मन्तव्यका क्रममा उपाध्यक्ष कँडेलले संस्थाले तय गरेको आगामी कार्यदिशा, साहित्यिक उद्देश्य र दीर्घकालीन यात्राबारे स्पष्ट धारणा प्रस्तुत गर्दै समाजको भावी योजनाबारे प्रकाश पारेकी थिइन् ।

कार्यक्रमको मुख्य आकर्षणका रूपमा उपस्थित स्रष्टाहरूले आफ्ना विविध विधाका सिर्जनाहरू वाचन गर्दै कार्यक्रमलाई काव्यिक सुगन्धले थप जीवन्त बनाएका थिए । यसै अवसरमा आयोजना गरिएको मुक्तक वाचन प्रतियोगिताको नतिजा अध्यक्षद्वारा सार्वजनिक गरिएको थियो । प्रतियोगितामा उत्कृष्ट प्रदर्शन गर्ने स्रष्टाहरूलाई प्रथम, द्वितीय र तृतीय स्थानका प्रमाणपत्र प्रदान गरिएको थियो ।

विशेष सम्मानस्वरूप साहित्य क्षेत्रमा उल्लेखनीय योगदान पुर्‍याएको कदर गर्दै सलिन विष्टलाई ‘उत्कृष्ट सर्जक’ उपाधिसहित प्रशंसा पत्र प्रदान गरिएको थियो । साथै कार्यक्रममा सहभागी सम्पूर्ण स्रष्टा तथा सर्जकहरूलाई प्रोत्साहनस्वरूप मायाको चिनो र प्रमाणपत्र वितरण गरिएको थियो ।

अध्यक्ष राजेश भण्डारीको समापन मन्तव्य तथा कार्यक्रम सफलतापूर्वक सम्पन्न भएको घोषणासँगै औपचारिक सभा विसर्जन गरिएको थियो । जुनकिरी साहित्य समाजको यो प्रथम वार्षिकोत्सवले नेपाली साहित्यको उज्यालो भविष्यप्रति आशा र विश्वास थप बलियो बनाएको छ ।