दक्षिण अष्ट्रेलियामा लेबरको पुनः विजय, Premier Peter Malinauskas दोस्रो कार्यकालमा

Australian Labor Party ले South Australia मा पुनः सरकार गठन गर्न सफल भएको छ। प्रिमियर Peter Malinauskas दोस्रो कार्यकालका लागि निर्वाचित भएका छन्। आर्थिक दबाब र सार्वजनिक सेवासम्बन्धी चुनौतीहरूले प्रभावित यस निर्वाचनमा मतदाताहरूले पुनः लेबरप्रति विश्वास व्यक्त गरेका हुन्।

यो परिणामसँगै Malinauskas को नेतृत्व अझ सुदृढ भएको छ। सरकारले बढ्दो जीवनयापन खर्च, आवास संकट तथा स्वास्थ्य सेवामा देखिएको चाप व्यवस्थापन गर्ने आफ्नो नीति र प्राथमिकतालाई निरन्तरता दिने अपेक्षा गरिएको छ।

निर्वाचन अभियानभर ‘जीवनयापन खर्च’ मुख्य मुद्दाका रूपमा उठाइएको  थियो। साथै, स्वास्थ्य क्षेत्र-विशेषगरी एम्बुलेन्स ढिलाइ (ambulance ramping) र अस्पतालहरूमा बढ्दो दबाब मतदाताहरूको प्रमुख चिन्ताको विषय बनेको थियो।

प्रिमियरले शनिबार साँझ आफ्ना समर्थकहरूलाई सम्बोधन गर्ने कार्यक्रम रहेको छ, जहाँ अन्तिम मत परिणामहरू अझ स्पष्ट हुने अपेक्षा गरिएको छ।

यसैबीच, Liberal Party of Australia का लागि यो परिणाम अर्को चुनौतीपूर्ण झट्का बनेको छ। पार्टीले २०२२ मा सत्ता गुमाएपछि पुनर्गठनको प्रयास जारी राखेको छ। विपक्षी नेतृ Ashton Hurn ले पनि आजै आफ्नो प्रतिक्रिया दिने अपेक्षा गरिएको छ।

वरिष्ठ लिबरल सिनेटर Anne Ruston ले हारका बाबजुद हर्नको नेतृत्वप्रति पूर्ण समर्थन जनाउँदै पार्टी एकजुट हुनुपर्नेमा जोड दिएकी छन्।

निर्वाचन विश्लेषक Casey Briggs का अनुसार Pauline Hanson’s One Nation को प्रदर्शन “राजनीतिक भूकम्प” सरह देखिएको छ, जसले साना दलहरू र विरोधी मतहरूको बढ्दो प्रभावलाई संकेत गर्दछ।

लेबरले महानगरीय क्षेत्रमा बलियो समर्थन प्राप्त गरे पनि ग्रामीण क्षेत्रमा चुनावी प्रतिस्पर्धा जटिल देखिएको छ, जहाँ साना दलहरू र स्वतन्त्र उम्मेदवारहरूले उल्लेखनीय उपस्थिति देखाएका छन्।

(थप विवरण आउन बाँकी…)