साहित्यकार एवं रचनाकार नारदप्रसाद आचार्य ‘सुदामा’ द्वारा लिखित लघुकथा – “अदृश्य”

लघुकथा

शीर्षकः अदृश्य

नारदप्रसाद आचार्य ‘सुदामा’ –

“तिमीलाई दुईटा खबर छ ।”  एका बिहानै मलाई फोनले झस्कायो ।

धेरै दिनपछि अमरले मलाई सम्झेका थिए ।

उनी बेला–बेला समीरका खुसी ल्याउँथे । समीर एक आदर्शवादी मित्र थिए ।

उनको प्रशंसा साथीभाइ माझमा चुलिएको थियो ।

अमेरिकी जीवन अति व्यस्त ! साथीभाइसँग भेटघाट गर्ने मसँग फुर्सदै हुन्नथ्यो ।

मैले जिज्ञासा राखेँ- -“कस्तो खबर हो मित्र ?”

हालखबर सोधनी गरेपछि उनले धेरै कुरा सुनाए । मनमा एक तमासको चौचौ बढ्यो ।

अन्त्यमा दुई वटा खबर रोज्न लगाए—सुखद र दुखद । समाचार सुन्ने उत्कण्ठाले एक्कासी मेरो मुखबाट ‘दु:खद’ शब्द निस्कियो ।

अमरले मलिन स्वरमा भन्यो- -“आकाशले सहर छोडेछ ।”

जिज्ञासापूर्वक मैले भनेँ- “ला…! हो र ? के भएछ उसलाई ? अनि अर्को सुखद कुरा चैँ के हो यार ?”

थमथमाउँदै ऊ बोल्यो- -“अस्ति पवित्र स्थलमा अश्लील शब्दले पुष्पवृष्टि गर्ने ‘व्यक्तित्व’ थाहा पाइयो नि !

वास्तविकता पत्ता लगाउँदा नररूपी नरपशु पो रहेछन्  ।” म अचम्ममा परेँ ।

त्यो कुरा मेरो कानलाई विश्वास भएन । किनभने विषय मेरो सहृदयी मित्रको थियो ।

अनि उनी आदर्शको पात्र पनि । जानी- जानी मैले सोधेँ- -“को रहेछन् , ती भाग्यमानी महोदय ?”

उताबाट उत्तर आयो- -”हावाले भरिएको बेलुन जस्तो उडन्ते नबनी आदर्शवान बन्दा के जान्थ्यो र !”

— हेरिस्वर्ग, पेन्सिलभेनिया, संयुक्त राज्य अमेरिका

लेखक हाल त्रिवेणी साहित्य मञ्च, हेरिस्वर्ग, पेन्सिलभेनिया, संयुक्त राज्य अमेरिकाको सचिवको जिम्मेवारी सम्हालिरहनु भएको छ। साहित्य, संस्कृति र समुदायप्रतिको गहिरो प्रतिबद्धताका कारण उहाँ विभिन्न साहित्यिक तथा समाजसेवी सङ्गठनहरूसँग पनि सक्रिय रूपमा आबद्ध रहनु भएको छ। नेपाली भाषा, साहित्य र पहिचानको प्रवर्द्धनमा निरन्तर योगदान दिँदै आउनु भएका उहाँले नेपाली प्रवासी समुदायमा प्रेरणादायी स्थान स्थापित गर्नुभएको छ। हाल उहाँ केन्द्र न्युज मा सल्लाहकारको रूपमा सक्रिय भूमिका निर्वाह गरिरहनु भएको छ।