दानको आवरणमा आतंक वित्तपोषण: अष्ट्रेलियालीहरूलाई सतर्क रहन आग्रह

अष्ट्रेलियाली नागरिकहरूलाई दान गर्दा विशेष सतर्कता अपनाउन आग्रह गरिएको छ, किनभने केही आतंकवादी संगठनहरूले आफूलाई वैध परोपकारी संस्थाको रूपमा प्रस्तुत गर्दै अवैध रूपमा रकम संकलन गरिरहेका छन्।

Joint Threat Financing Group (JTFG) द्वारा जारी संयुक्त विज्ञप्तिअनुसार, यस्ता समूहहरूले नक्कली प्रमाणपत्र, भ्रामक अभियान तथा भावनात्मक अपिलमार्फत सर्वसाधारणलाई भ्रममा पारेर रकम उठाउने प्रयास गरिरहेका छन्।

अधिकारीहरूका अनुसार, यी संगठनहरूले आफूलाई मानवीय सहायता प्रदान गर्ने संस्थाका रूपमा प्रस्तुत गर्दै दाताहरूलाई विदेशमा रकम पठाउन प्रेरित गर्छन्। तर, उक्त रकम अन्ततः आतंकवादी गतिविधिमा प्रयोग हुने गरेको पाइएको छ।

Australian Federal Police (AFP) ले स्पष्ट पारेको छ कि आतंकवादी संगठनलाई रकम उपलब्ध गराउनु जानेर वा नजानेर अष्ट्रेलियाली कानुनअनुसार गम्भीर आपराधिक अपराध हो। यस्तो कसुरमा अधिकतम २५ वर्षसम्म कैद सजाय हुन सक्छ भने आतंकवाद वित्तपोषणमा संलग्न पाइएमा आजीवन कारावाससम्मको सजाय हुन सक्छ।

AFP का सहायक आयुक्त Stephen Nutt ले भने,
“च्यारिटीको आवरणमा आतंकवादी गतिविधिका लागि रकम संकलन गर्ने प्रवृत्ति लामो समयदेखि प्रयोग हुँदै आएको एक धोखापूर्ण रणनीति हो। यी समूहहरूले सर्वसाधारणको सद्भावनाको खुला दुरुपयोग गर्छन्।”

अधिकारीहरूले दान गर्नु अघि सम्बन्धित संस्थाको विश्वसनीयता र वैधता अनिवार्य रूपमा जाँच गर्न आग्रह गरेका छन्। Australian Charities and Not-for-profits Commission (ACNC) को आधिकारिक दर्ता सूचीमार्फत संस्थाको उद्देश्य, सञ्चालन क्षेत्र, लाभग्राही र वित्तीय पारदर्शितासम्बन्धी विवरणहरू सजिलै जाँच गर्न सकिन्छ।

साथै, अष्ट्रेलियालीहरूले राष्ट्रिय प्रतिबन्ध (sanctions) सम्बन्धी कानुनहरूको पूर्ण पालना गर्नुपर्नेछ। अष्ट्रेलियाको Consolidated List मा सूचीकृत व्यक्ति वा संस्थालाई कुनै पनि प्रकारको आर्थिक सहयोग उपलब्ध गराउनु गैरकानुनी हो, जसमा १० वर्षसम्म कैद तथा ठूला जरिवाना हुन सक्छन्।

Australian Transaction Reports and Analysis Centre (AUSTRAC) ले सन्दिग्ध वित्तीय गतिविधिहरू पहिचान तथा नियन्त्रण गर्न महत्त्वपूर्ण भूमिका निर्वाह गर्दै आएको छ। AUSTRAC का उप–कार्यकारी निर्देशक (इण्टेलिजेन्स) John Moss ले भने,
“आतंकवादी समूहहरूले दानको नाममा रकम स्थानान्तरण गर्न सर्वसाधारणको सद्भावनालाई योजनाबद्ध रूपमा दुरुपयोग गरिरहेका छन्।”

उनले थपे,
“AUSTRAC ले JTFG अन्तर्गत आफ्ना साझेदार निकायहरूसँग समन्वय गर्दै सन्दिग्ध वित्तीय प्रवाह पहिचान गरी त्यस्ता रकम आतंकवादी संगठनसम्म पुग्न नदिन सक्रिय रूपमा काम गरिरहेको छ।”

JTFG ले Australian Border Force, Australian Criminal Intelligence Commission, Australian Taxation Office लगायतका सरकारी निकायहरू तथा अन्तर्राष्ट्रिय सुरक्षा साझेदारहरूसँग सहकार्य गर्दै आएको छ।

यदि कुनै च्यारिटी वा मानवीय संस्थाले मागेको सहयोग शंकास्पद लागेमा, राष्ट्रिय सुरक्षा हेल्पलाइन 1800 123 400 मा सम्पर्क गर्न आग्रह गरिएको छ।

Source:AFP/Media