क्यानबेरामा SSDRC काठमाडौँलाई सहयोग जुटाउने उद्देश्यले च्यारिटी डिनर आयोजना हुँदै
क्यानबेरा, अस्ट्रेलिया। काठमाडौँस्थित अपाङ्गता तथा अटिजम भएका बालबालिकाको शिक्षा, विकास तथा पुनर्स्थापनामा कार्यरत विशेष विद्यालय तथा पुनर्स्थापना केन्द्र (SSDRC) लाई सहयोग जुटाउने उद्देश्यले अस्ट्रेलियाको क्यानबेरामा च्यारिटी डिनर आयोजना हुने भएको छ।
Kendra News को वार्षिकोत्सव तथा सन् २०२७ को अंग्रेजी नयाँ वर्षको शुभकामना आदानप्रदान गर्ने अवसरमा आयोजना हुन लागेको “Charity Dinner with Nepalese Community & NRNA in Canberra” आगामी शुक्रबार, २७ नोभेम्बर २०२६ का दिन साँझ ५ बजे सञ्चालन हुनेछ।
कार्यक्रम SIVIC Team, Canberra र NIB Star Media को आयोजनामा तथा गैरआवासीय नेपाली संघ (NRNA) अस्ट्रेलियाको ACT टोलीको विशेष सहयोग र समन्वयमा हुन लागेको हो।
SSDRC का बालबालिकालाई सहयोग जुटाउने लक्ष्य
कार्यक्रमको मुख्य उद्देश्य अपाङ्गता तथा अटिजम भएका बालबालिकाको शिक्षा, विकास, थेरापी तथा पुनर्स्थापनाका लागि सहयोग जुटाउनु हो। सामाजिक सेवामा नेपाली समुदायको सहभागिता बढाउने र आवश्यकतामा रहेका बालबालिकाका लागि सहयोगी वातावरण निर्माण गर्ने लक्ष्य आयोजकले लिएको छ। च्यारिटी डिनरमार्फत क्यानबेरामा रहेका नेपाली समुदायका सदस्य, व्यवसायी, सामाजिक अभियन्ता तथा विभिन्न संघसंस्थाका प्रतिनिधिलाई एकै ठाउँमा जोड्दै सामाजिक उत्तरदायित्वप्रति जागरूकता अभिवृद्धि गर्ने अपेक्षा गरिएको छ।
कार्यक्रमले नेपाली समुदायबीच आपसी सद्भाव, आत्मीयता र सहकार्य बढाउनुका साथै नेपालमा रहेका सहयोग आवश्यक पर्ने बालबालिकाको जीवनमा सकारात्मक योगदान पुर्याउने विश्वास आयोजकले लिएको छ।
टिकट शुल्क तथा व्यावसायिक सहयोग
आयोजकका अनुसार कार्यक्रममा सहभागी हुन प्रतिव्यक्ति ६५ अस्ट्रेलियन डलर टिकट शुल्क निर्धारण गरिएको छ। त्यस्तै, व्यवसाय तथा व्यावसायिक प्रतिष्ठानका लागि १७० अस्ट्रेलियन डलरको व्यावसायिक सहयोग प्याकेज उपलब्ध गराइनेछ।
व्यावसायिक सहयोग प्याकेजअन्तर्गत सम्बन्धित व्यवसायको लोगो कार्यक्रमका प्रमाणपत्र तथा ब्यानरमा समावेश गरिनेछ। साथै, सहयोग गर्ने व्यवसायका तर्फबाट एक जनालाई कार्यक्रममा सहभागी हुन टिकट उपलब्ध गराइने आयोजकले जनाएको छ।
टिकट बाहेक थप अनुदान गर्न इच्छुक व्यक्ति वा संस्थाले गर्न सक्नुहुनेछ र यदि कसैले थप अनुदान गरेमा सो को विवरण अनुदानको नामावलीमा प्रकाशन गरिनेछ।
नेपाली समुदायलाई सहभागिताका लागि आह्वान
आयोजक समितिले क्यानबेरा तथा आसपासका क्षेत्रमा बसोबास गर्ने नेपाली समुदाय, व्यवसायी, सामाजिक संघसंस्था र शुभेच्छुकलाई कार्यक्रममा सहभागी भई यस सामाजिक अभियानलाई सहयोग गर्न आग्रह गरेको छ।
अंग्रेजी नयाँ वर्षको स्वागत तथा शुभकामना आदानप्रदानसँगै सामाजिक सेवामा योगदान पुर्याउने उद्देश्यले आयोजना हुन लागेको यस कार्यक्रमले नेपाली समुदायबीचको सम्बन्ध थप बलियो बनाउने र SSDRC का बालबालिकाको शिक्षा तथा पुनर्स्थापनाका लागि सहयोग जुटाउन मद्दत गर्ने अपेक्षा गरिएको छ।
कार्यक्रमको आयोजनामा SIVIC Team, Canberra र NIB Star Media संलग्न छन् भने NRNA-ACT ले सहकार्य तथा समन्वय गर्नेछ। आयोजक समितिका तर्फबाट डा. कलम खड्का, नवीन पौडेल तथा उमेश ढकालको नाम उल्लेख गरिएको छ।
Most read
2026 ACT Multicultural Awards recognise community leaders and organisations
Four More Bodies Recovered from Himlung Avalanche in Nepal
Melbourne Airport Rail Stage 2 to begin preliminary works
Bell Bay Aluminium Secured with $200 Million Government Support Package
Melbourne Children’s Hospital Investigates Possible Staff Exposure to Chemotherapy Chemicals
